Bujang Skrang

Gelaq nama Bujang Skrang semina engkeman dikena anak lelaki ke datai ari menua Batang Skrang. Gelaq nama nya bepun ari pengawa enggau pengidup anak lelaki orang Batang Skrang, ke dulu suba tebilang amat pegi gawa ka menua bukai laban deka ngulih ka pengidup sereta enggau penemu dikena ngidup ka diri.

Bisi sekeda, tak semina baru angkat bujang, udah pegi nyempulang kaban aya tauka bala menyadi ke udah bisi penelebaq pegi gawa di menua bukai. Lebuh gawa di menua orang, dia iya belajar ka jalai ngereja maioh macham pengawa, nitih ka pengelandik enggau pemintar berunding belajar ka jalai pengidup bansa bukai.

Kadang-kadang sida ke pegi gawa ka menua bukai amat suntuk penemu enggau pemandai pelajar sekula. Tang bepelasar ka pengeransing enggau pengeliat ati, dia ari ke nyau betaun-taun gawa sereta belajar ka penemu enggau pengelandik di menua bukai, enda berasai umur tudah nyau majak tuai-setuai. Taja pia, enti penemu enggau pengelandik ngereja pengawa dikena ngidup ka diri agi empai bisi ka bekal dibai pulai, dia iya tetap agi ngemeran ka pengawa gawa di menua orang nyentok ka iya bisi 'utai ulih' dibai pulai nyadi ka tanda anak Skrang udah pegi bekereja di menua orang. Ketegal ke lama rindang ngulih ka penemu enggau reta di menua bukai, dia lebuh maia mulai ka diri ke menua di rumah panjai, umur pan nyau udah tuai tang lalu empai bebini.

Ukai ketegal enggai bebeini tumu tauka ukai ketegal orang indu enggai tang laban bekira ka pengidup ke dudi hari. Nya alai, lebuh apai-indai meda anak ti pulai pegi, bisi penemu enggau pengelandik ngereja pengawa dikena ngidup ka diri, dia baru sida iya berunding ngiga indu dara ke patut ditanya nyadi ka menantu. Umur amat udah lunggar tang Anak Skrang ke udah pegi belelang gawa di menua bukai amat diperening bala indu dara laban enda maioh orang ke ulih beberita pegi gawa di menua orang. Nya meh kabuah, gelaq nama Bujang Skrang lalu lekat nyadi ka jaku semaq orang, baka Bujang Skrang.