Ngeluar ka Album Baru

Berunding ngeluar ka album baru tang ukai aku empu. Arap nya tau nyadi nyata sereta ulih dijual sebedau ujong taun 2010.

Read more...

Datai Baru di BINTULUfm

Kepeundi aku di asuh gawa sementara di BINTULUfm dalam bulan Oktober 2009. Maia nya maioh amat kereja digaga laban maioh macham aktiviti bisi di atur di Bagi Menua Bintulu. Program dalam jaku Iban ditabor ka nengah BINTULUfm 97.50 maioh mega diubah baru. Nyadi diatu, nyauudah datai ba bulan Mac 2010, kurang lebih empat bulan, bulan April 2010 aku sekali agi di asuh gawa di stesen BINTULUfm ngemata ka semua pekara bekaul enggau RTM Bintulu. Selamat betemu baru.

Read more...

Belelang

Taun nyau udah ga beganti, enda berasai telunga-lunga diau di menua orang. Ruai lama enda dianchau ka tikai laban lama enda pulai. Enti nitih ka ati, segi enda semaia ka pulai laban agi rindu diau di menua orang. Tang ka pan enda mulai ka diri laban ingat ka apai-indai ti lama udah di tinggal ka ba rumah panjai. Datai di menua aku di sambut enggau chukup pengaga, bisi sekeda bala menyadi enggau kaban belayan, dipeda enda berupai, alai ai mata labuh bekeberai laban kelalu sayau sereta lama enda betemu. Bisi sekeda ngumbai aku enda pulai agi, iya ke serambau angkat bujang enggau dara suba, diatu udah bisi anak magang. sekeda anak sida udah besekula, ngagai pelajar secondary. Nya baru tudah aku, nemu umur diri amat nyau udah jauh nyingkang taja pan ati asai ke biak berari tang umur nyau ka kelanjur, nadai betati deka bebini leboh dimenua orang. Indu ukai nya nadai, ukai tegal sida enggai tang bangat udu balat teperindang di menua orang. Diatu baru aku ngetu ngenduh, berunding ka jalai nyaga apai-indai ke udah tuai sereta lama udah di tinggal ka pegi belelang ngiga peneleba gawa di menua orang. Semua penemu ti di ulih di menua orang tetap nyadi ka lalau lebuh ngidup ka diri di menua aku.
Nya meh kabuah, orang selalu besemaq tauka ka begelaq ka nama Bujang Skrang.

Read more...

BINTULUfm

Selamat betemu baru. Ukai enda ibuh ka ruai tang nadai tentu ari nganchau tikai laban ke bisi kerja ka bukai. Taja pia, arap ka meruan nyenguk enti lebuh maia mansa Ruai Bujang Skrang.
Diatu, Ambai Kumang sekali agi deka nurun ari Panggau Ruai Bujang Skrang lalu di asuh gawa sementara di BINTULUfm dalam bulan Sepuloh 2009. Selamat bekelala ngagai kita di Bintulu sereta enti bisi maia lalu sereta duduk meh ba Ruai Bujang skrang ditu.
Nganti datai di Bintulu ila tentu bisi agi awak mai berita bukai.
Terima kasih.

Read more...

Berita Ari Panggau Ambai Kumang

DJ Ambai Kumang

KARAOKE KIN-KITU

Beduduk ari Ruai Bujang Skrang, diatu DJ Ambai Kumang suah nurun ari panggau iya, lalu nyendia ka Karaoke Kin-Kitu nitih ka peminta ari orang ti beguna ka system belagu ngena karaoke. Iya suah dipeda kitai ba sekeda pengerami di Bandaraya Kuching; sekali ka ba hotel, dewan tauka rumah panjai, laban dipinta nyendia serta nyadi Deejay ba pengerami orang melah pinang tauka ka pengerami makai lemai enggau pengerami bukai ti beguna ba sound system enggau karaoke.

Lagu-Lagu ti bisi disediaka iya tebal agi endang lagu-lagu Iban, Bahasa Melayu, English enggau sekeda lagu bansa bukai.

Bayar nyendia ka pengawa nya numbas iya pemar, nitih ka pengawa.

Orang ti bisi ati deka beguna ka P.A. & Karaoke System tau nganjong e-mail ngagai iya ngena : ambaikumang@radiokitai.com.

Terima kasih.

Read more...

Ambai Kumang

Nama Lagu : Ambai Kumang
Tiun Lagu : David Till
Leka Lagu : Francis Linggie Nyaran
Penyanyi : DJ Ambai Kumang

Ambai Kumang pungka lelaki,
Enda surut seleka padi,
Biar nyawa lesi bebadi,
Nuan Kumang tetap ku ambi.
Nuan dara peruji ati,
Anak asi apai enggau indai,
Chukup bajik nadai nimpang,
Aruh nuan begelar Kumang.
chrs
Nyema nuan diempu aku,
Segi diandai selalu,
Biar aku begadai nyawa,
Asal tua begulai sama,
Aku sanggup merinsa tegal dara,
Ambai Kumang mutus ati lancham simbang.
Nuan dara peruji ati,
Anak asi apai enggau indai,
Chukup bajik nadai nimpang,
Aruh nuan begelar Kumang.


Nama kabuah penyanyi tu dikangau ka orang Ambai Kumang?

....Tiap bengkah macham leman utai ke di dunya tu endang bisi nama magang, digaga sereta diberi Petara nama. Nadai siti utai didunya tu ngaga nama tauka ngelaq diri, kelimpah ari sekeda bala kitai ke nyau sepeneka ati nelah diri empu. Kitai mensia ada, digaga ka apai-indai nama sepengudah kitai ada.
Baka nya mega Francis Linggie Nyaran ti dikangau ka orang Ambai Kumang, ukai iya empu nelah tauka nitah diri ngena nama nya.
Nama Ambai Kumang lekat ba iya ketegal pengerindu peminat ka lagu ti benama Ambai Kumang ke nyadi nama Album Lagu Iban ti terubah dinyanyi iya dalam taun 90an suba. Beduduk ari nya, dia sida ti ninga Radio lebuh iya bejaku dalam program di Radio lalu madah ka iya patut digelaq Ambai Kumang laban nadai lagu Iban udah digaga ngena nama lagu nya.
Terima kasih.

Read more...

Bujang Skrang

Gelaq nama Bujang Skrang semina engkeman dikena anak lelaki ke datai ari menua Batang Skrang. Gelaq nama nya bepun ari pengawa enggau pengidup anak lelaki orang Batang Skrang, ke dulu suba tebilang amat pegi gawa ka menua bukai laban deka ngulih ka pengidup sereta enggau penemu dikena ngidup ka diri.

Bisi sekeda, tak semina baru angkat bujang, udah pegi nyempulang kaban aya tauka bala menyadi ke udah bisi penelebaq pegi gawa di menua bukai. Lebuh gawa di menua orang, dia iya belajar ka jalai ngereja maioh macham pengawa, nitih ka pengelandik enggau pemintar berunding belajar ka jalai pengidup bansa bukai.

Kadang-kadang sida ke pegi gawa ka menua bukai amat suntuk penemu enggau pemandai pelajar sekula. Tang bepelasar ka pengeransing enggau pengeliat ati, dia ari ke nyau betaun-taun gawa sereta belajar ka penemu enggau pengelandik di menua bukai, enda berasai umur tudah nyau majak tuai-setuai. Taja pia, enti penemu enggau pengelandik ngereja pengawa dikena ngidup ka diri agi empai bisi ka bekal dibai pulai, dia iya tetap agi ngemeran ka pengawa gawa di menua orang nyentok ka iya bisi 'utai ulih' dibai pulai nyadi ka tanda anak Skrang udah pegi bekereja di menua orang. Ketegal ke lama rindang ngulih ka penemu enggau reta di menua bukai, dia lebuh maia mulai ka diri ke menua di rumah panjai, umur pan nyau udah tuai tang lalu empai bebini.

Ukai ketegal enggai bebeini tumu tauka ukai ketegal orang indu enggai tang laban bekira ka pengidup ke dudi hari. Nya alai, lebuh apai-indai meda anak ti pulai pegi, bisi penemu enggau pengelandik ngereja pengawa dikena ngidup ka diri, dia baru sida iya berunding ngiga indu dara ke patut ditanya nyadi ka menantu. Umur amat udah lunggar tang Anak Skrang ke udah pegi belelang gawa di menua bukai amat diperening bala indu dara laban enda maioh orang ke ulih beberita pegi gawa di menua orang. Nya meh kabuah, gelaq nama Bujang Skrang lalu lekat nyadi ka jaku semaq orang, baka Bujang Skrang.

Read more...